2024-yilning 17-oktyabr kuni Biznes va tadbirkorlik oliy maktabida direktor o‘rinbosari Mirkomil Odilov boshchiligida Osiyo taraqqiyot banki (OTB) Markaziy va G‘arbiy Osiyo mintaqasida operatsiyalarni muvofiqlashtirish bo‘yicha bosh mutaxassisi Shayista Husayn xonim boshchiligidagi delegatsiya bilan uchrashuv bo‘lib o‘tdi.

Uchrashuv korporativ sektor va davlat xizmatlari uchun malakali mutaxassislarni tayyorlashga ularni kasbiy salohiyatni oshirish va ta’lim dasturlarini hamkorlik orqali rivojlantirish masalalariga bag‘ishlandi. Oliy maktab direktor o‘rinbosari Mirkomil Odilov so‘nggi yillarda faol rivojlanib borayotgan OTB bilan yaqin hamkorlik muhimligini ta’kidladi.

Uchrashuvda Oliy maktab davlat sektori uchun kadrlar tayyorlash bo‘yicha yetakchi muassasalardan biri ekanligi alohida ta’kidlandi. Oliy maktab JICA, GIZ va Fransiya taraqqiyot agentligi (AFD) kabi xalqaro tashkilotlar bilan faol hamkorlik qilishi va iqtisodiyotning turli sohalarida menejerlarni tayyorlash bo‘yicha o‘z dasturlarini ishlab chiqishda davom etmoqda.

Shuningdek, yig‘ilishda loyiha boshqaruvi kurslarini PMI va FIDIC kabi xalqaro standartlar va tashkilotlar talablariga moslashtirish muhimligi ko‘rib chiqildi. Uchrashuv yakunida tomonlar hamkorlikni davom ettirishga, shu jumladan O‘zbekistonda tadbirkorlikni yanada rivojlantirish hamda kadrlar tayyorlashga qaratilgan treninglar va ta’lim dasturlarini tashkil etish bo‘yicha hamkorlikni davom ettirishga kelishib oldilar. 

Ma’lumot uchun, Osiyo taraqqiyot banki (OTB) 1966 yilda tashkil etilgan, bosh qarorgohi Manilada (Filippin) joylashgan yetakchi xalqaro moliyaviy tashkilotlardan biridir. OTB 68 ta davlatni, shu jumladan 49 ta mintaqaviy va 19 ta Yevropa mamlakatlarini hamda AQShni birlashtiradi. Bankning eng yirik aksiyadorlari Yaponiya va AQShdir.

O‘zbekiston 1995 yilda OTBga a’zo bo‘lgan, bankning mamlakatdagi vakolatxonasi 1998 yilda ochilgan. O‘sha paytdan beri OTB O‘zbekistonga iqtisodiyotning turli tarmoqlarida 73 ta loyihani amalga oshirish uchun katta miqdorda sarmoya kiritdi. Hamkorlikning asosiy yo‘nalishlari qatoriga infratuzilmani rivojlantirish, kichik biznes va tadbirkorlikni qo‘llab-quvvatlash, yashil iqtisodiyot mexanizmlarini joriy etish, shuningdek, davlat va xususiy sheriklikni mustahkamlash kiradi.